Drama

image credit to orig uploader

"Si Erwin nga pala," biglang singit ni Carla sa kalagitnaan ng kulitan ng kanyang mga tropa, "Boyfriend ko"

"Hello, hello sa inyo!" segunda ko naman.

Panandaliang natahimik ang kanina'y nag-aagawang boses ng magkakaibigan. Kung hindi pa tatayo ang isa para kamayan ako wala din sigurong papansin sa mukha kong pang neutral lang ang dating. Commoner ba.

"Mae, nga pala!" nakangiti nyang bati sabay shake hands sakin. Kinindatan si Carla sabay siko sa tagiliran. "Bilis ng kapalit ha!"

Natawa lang ako. Alam ko kasing joke yun kahit may suntok ng reyalidad. Kahit siguro sino ay hindi maniniwala sa biglaang relasyon namin ni Carla. Kaka-break lang nila ng tatlong taon nyan nobyo, kahapon. Ang totoo pa nga eh, napadaan lang ako sa tapat ng bahay nila. Akala ko nagpa-praktis lang sya umiyak para sa bago nilang stage play sa school, pero nang may sipon ng kasama, alam kong seryoso na ang lahat.

"Si Ruby, Alex, Rein, at Nicole" inisa-isa ni Mae ang bawat miyembro. Ngumiti lang ako tsaka naupo sa bakanteng upuan. "Si Erwin nga pala! Ang bagong boyfriend ni Carla, na medyo suplado" tawanan ang grupo.

Matagal ko ng type si Carla. Ever since isinara ang dating eskinitang nilulusutan ko para madaling makauwi sa amin. Mahilig sya umarte, mag-gitara, at maglaba paminsan-minsan. Noong una tamad pa kong sulyapan sya. Mukha kasing suplada ang dating ng kanyang pagka-chinita. Nag-crack lang ang wall sa pagitan namin ng sinipa ko ang kakalat kalat na pusa noong lasing ako. Nagalit sya. Hindi sa akin, kundi sa pusa. Nakaharang daw sa daan. Weirdong babae.

Nagpalitan kami ng ngiti hanggang sa nauwi sa palitan ng koleksyon namin ng mga cd's. Kanya kayang share sa paboritong banda at iba't ibang genre ng musika. Mababaw na usapan then nauwi sa malalimang kwentuhan tungkol sa buhay pag-ibig. Hindi ako nagkamali. Taken na sya. Kwento ko naman, taken din ako kahit hindi. May maipagyabang lang. Janna ang unang pangalang pumasok sa isip ko, kaya yun ang pinaniwalaan nya.

"San si Christopher?" maingat nyang tanong kay Mae. Ayaw yatang iparinig sakin kahit na 1 inch lang ang pagitan namin.

"Darating daw sya pero male-late lang," sumisiko pa ulit "Ipapakilala mo sya?"

"Hindi!" mabilis na tanggi ni Carla "Ibabalik ko lang itong gitara nya."

Ibang klase magmahal si Carla. Kung kailangang mag-joke ng corny gagawin nya mapasaya lang si Christopher. Kapag may bagyo, hindi bale ng magkasakit maihatid lang ang payong sa pinapasukang eskwelahan. Walang pakielam sa eyebag nya. Ang importante ay matanggap ng kabila ang salitang sorry kahit ang lalaki ang may kasalanan. Lahat iyon, na-chika nya sa akin ng gabing umaagos ang luha nya kasabay ng sipon. Tulad ng role ng totoong bida, pag-comfort sa babaeng mahal nya ang una. May punch line pa na bakit hindi nalang tayo. Sabay ngiti at sundok ng "joke lang!"

"May bago sa tropa?" si Christopher.

Walang gustong sumagot. Lahat nakatingin sakin at kay Carla. Ayaw yatang mapagbintangang kamag-anak sila ni Boy Abunda. Tumayo si Carla para iabot ang gitara. Sabay hawak sa kamay ko at hinila papalayo sa mga kaibigan.

"Carla, wait!" habol ni Christopher. Huminto kami syempre. "Pumunta ako hindi para dito sa gitara. Gusto kitang maka-usap"

"Nag-uusap na tayo"

"Gusto kong mag sorry.."

"Para san?" matapang na sagot ng babaeng nagpipigil ng luha. "Sorry? Para mag sorry?! Para tayo na ulit tapos same process?!"

Nawalang ng script si Christopher. Na-blangko sa atake. Sa expression palang ng mukha nya, alam ko ng gustong lumuhod nito at magmaka-awa para balikan lang sya ni Carla. Pinanalangin kong tatagan nya ang loob nya at wag na muling magpaloko pa sa lalaking umubos ng tissue paper nila at detergent powder kakalaba sa mga panyo.

"Si Erwin nga pala," nakangiti sya. Nahulaan ko na ang kasunod. "Boyfriend ko!"

Palakpak ang tenga ko. Lundag ang puso ko sa tuwa. Masaya ko syang inihatid sa bahay nila habang napag-uusapan namin si Christopher. Ginagaya ko pa ang pagmamaka-awa nya. Inuulit ulit naman ni Carla ang mga sinabi nya na parang 'di makapaniwala sa sarili.

"Thanks, Erwin!" kasunod ng isang yakap. "Buti nandyan ka. May utang ako sayo ha!"

"Hug palang parang bayad na e," biro ko sabay kabig ng joke lang ulit. "Una na ko"

"Ingat, pakisabi kay Janna hindi ko inagaw ang boyfriend nya."

"Makakarating, Miss best actress!" sabay kamot sa ulo.

-end



9 comment/s:

Lheor Serdoncillo said...

friend zone

amphie said...

ay, hindi po yan friendzone :)

Mafe Sumampong Garcia said...

Drama talaga. hihi! best actor and actress..

pinkline said...

ouch! may pa-janna janna pa kasi eh hehe..nice story :)

amphie said...

yan ang napapala ng maling diskarte :D

Zen said...

Hahaha.. Totoo po bang nangyari ito? Natawa ako dun sa part na lagi syang nagpapraktis umiyak, pero nung may sipon nang kasama eh may problema talaga sya.. hehehe :D

amphie said...

fiction lang po yan. salamat sa pagdaan!

amphie said...

famas! :D

Chico Reymart said...

palabas ngalng hehe mahusay bigyan ng award :D

Post a Comment