Fire Exit

Nabigla ako sa maagang pagpasok ni Sherwin na kadalasan ay palaging isang oras na late. Naabutan ko syang naglilinis ng kanyang cabinet sa pribadong kwarto na para lamang sa mga empleyado. Tinapik ko sya sa balikat at nginitian, ngunit hindi sya nagsukli ng anumang reaksyon. Malungkot at nakakabahala ang kanyang anyo na hindi naman bago sa kanya, dahil sa gabi ang kanyang duty bilang karelyebo kong gwardya sa isang private company.


"Resign na ko bro," mababaw ang kanyang tono.

Nagulat ako sa pahayag nya. Isang buwan na kaming magkasama, at ni isang reklamo ay wala akong narinig galing sa kanya. Liban nalang ngayon. Kapansin-pansin din ang biglaang pagbagsak ng kanyang pangangatawan at paglubog ng kanyang mga mata.

Hindi na sya nagsalita. Tulad ng ginawa ko, tinapik nya ko sa balikat at niyakap. Gusto ko sanang mag-usisa, kaso mukhang personal ang isyu.

"Sabi ni boss, darating daw ang kapalit ko bukas. Kailangan mong mag-straight ngayon." wika nya bago isara ang pinto.


Sa lahat ng oras ng duty, pang-gabi ang inaayawan ko. Hindi dahil sa ayokong mapuyat, o maboring. Ang kawalan ng makaka-usap sa panggabing trabaho ang kinaiinisan ko. Ayoko sa pakiramdam na parang ako na lamang ang tao sa mundo. Wala akong choice. Humihingi ng straight hours ang paglisan ni Sherwin. Mabuti na lang at nasira ang mic ng kapitbahay at hindi nakapag videoke.

"Goodnight Ma'am!" bati ko sa huling empleyadong lumabas. Isinulat ko sa record ang oras ng kanyang pag-alis. Eksaktong alas diyes. Overtime.

Maaga pa, pero dinadalaw na ko ng antok. Napilitan tuloy akong iwan ang aking pwesto at pumunta ng pantry para magtimpla ng kape. Dumaan ako ng fire exit para makarating sa unang palapag. Bawal na kasi ang paggamit ng elevator pagpatak ng alas nuebe. Dahan-dahan kong tinulak ang may kabigatang pinto. Lumikha ito ng ingay na nag-echo sa fire-exit. Bago pa tuluyang maglaho ang tunog ay magkakasunod na hagikhikan ang aking narinig.

"May tao pa ba dyan?" tanong ko kahit hindi siguradong may sasagot.

Malinaw ang tawa na narinig ko. Animo'y binibitay sa kiliti. Dumiretso agad ako ng pantry bago pa tumayo lahat ng balahibo ko sa ilong. Napilitan akong gumamit ng elevator pabalik sa ground floor, patungo sa pwesto ko. Natawa ako sa ginawa kong pagmamadali na halos matapon pa sa uniporme ko ang kape. Naisipan kong isulat sa likod ng record book ang naranasan ko, pero bago pa dumikit ang tinta ng ballpen sa pahina ay nanlaki na ang aking mga mata. May kapirasong papel na nakaipit sa pangalawang pahina mula sa likod.

May liham pala si Sherwin na naiwan. Naka-address pa ito sa akin. Binuksan ko agad. Naglalaman ito ng patungkol sa kanyang mga karanasan sa pagdaan sa fire exit. May katagalan na ang petsa. Nakakatawang isipin na hindi ko man lang napansin iyon. Dahil na din siguro sa pagiging abala sa pagbati sa mga guest tuwing umaga, kaya 'di ko naisipang magkalkal.

Kinabukasan, kahit puyat ay maaga akong dumating sa trabaho. Sa manager's office ang diretso ko. Bitbit ang liham na aking natuklasan at ang sulat na nagpapahayag ng aking tuluyang pagreresign. Inabangan ko munang umalis ang bisita bago ako pumasok. Sinalubong ako ni Mr. Roque ng isang masiglang ngiti. Kinamayan ko sya matapos kong bumati.

"What brings you here, Mr. Vuenabentura?"

"Sir, magre-resign na po ako." malinaw ang pagkakasabi ko, pero sa itsura ng manager nagmistulang alien ang wikang aking ginamit.

"May kinalaman ba 'to sa mababang sweldo?" mahinahon nyang tanong.

"Hindi po. Tungkol din po ito sa pagreresign ng kasama ko. Si Sherwin"

"Oh, ano ang tungkol doon?" naging seryoso ang kanyang anyo.

Sa halip na magpaliwanag, iniabot ko na lamang sa kanya ang record book kasabay ng aking resignation letter. Hindi ko na hinintay ang kanyang reaksyon o anumang sasabihin. Mabilis akong lumabas ng kwarto at tahimik na isinara ang pinto. Sariwa pa sa aking isip ang mga naging pahayag ni Sherwin sa maliit na piraso ng papel.


Dear, Bro.

Isang linggo na kong nakakarinig ng kakaibang ingay sa fire exit. Para bang mga hagikhik ng mga lamang lupa. Buong tapang kong binaba ang basement para alamin kung saan nanggagaling ang ingay. Sa janitor's closet ko natagpuan si Boss, at si Mang Raul. Kapwa walang suot na salawal. Huwag na huwag daw akong magsasalita ng tungkol sa aking nasaksihan. Kung hindi daw ako tatahimik ay sasabihin nya sa asawa kong isa din akong.. you know. Gusto nya akong i-black mail. Minabuti ko na lamang mag-resign. Kaya lang, iniisip ko kung paano na tayong dalawa?"


-end



~halloween post ko! XD

6 comment/s:

Pinkline said...

haha!...muntik na tumayo ang mga balahibo ko sa ilong dito ah..kala ko naman hmmm..kaloka!

amphie said...

tinamad na kong manakot sa ending kaya naging ganyan hehe!

Mafe_garcia02 said...

wahahahaha! ngaun q lng nbsa 2, late n aq sa mga updated na story.. 

starbuko1234 said...

haup kala ko na kung anu kala ko kasama sa undas tsk tsk....

amphie said...

halloween post ko yan, ginawang komedya lang hehe

amphie said...

busy ka yata sa love life kasi ;)

Post a Comment